Photo by Elmer Topp-Jørgensen

PISUNA pillugu suleqatigiinneq

Nunatta kitaani avannaanilu innuttaasut suleqatigalugit qarasaasiatigut paasissutissat PISUNAMIT katersorneqartarput. Taamatut suleqatigiissuteqarnermi siunertarineqarpoq pisuussutit uummassusillit pillugit piffinni assigiinngitsuni pissusiviusut allannguutillu nalunaarsorneqartarnissaat, taamaasiornernilu pisuussutit assigiinngitsut aqunneqarneranni ilisimasat toqqammavigalugit aalajangiisarnerit pisarnissaat siunertarineqarluni. Naatsumik oqaatigalugu, siunertarivarput piffinni assigiinngitsuni uummassusillit pillugit ilisimasat piujuaannartitsinerlu siunertaralugit paasissutissanik siaruarterisarsinnaasarnissaq.

Issittumi innuttaasut qangaanniilli nassuerutigisariaqarsimavaat, avatangiiserput siornatigumut sanilliullugu allatut pissuseqaleriartortoq. Pisuussutit ilaat peerukkiartorput. Allat piffissami sivisuumi peqanngissimariarlutik takkuteqqittalerput, aammali ilaat siornatigorniit amerlanerujussuanngorlutik takussaaleriartortarlutik. Pisuussutit uummassusillit pissuserisamikkut innuttaasorpassuarnut isertitatigut inuuniarnermilu periarfissatigut sunniuteqartarput. Piniartut aalisartullu akornanni avatangiisit allanngoriartornerat nalunaarsorneqarlutillu oqallisigineqartuartarput, paasissutissallu tamakku tamatigut amerlasuutigut pisortanut naalakkersuinikkullu oqartussanut aalajangiinissani tunuliaqutissatut apuuneqarpiarneq ajorlutik, taamaasillunilu kommunit qitiusumillu oqartussat pisassiissutit aqunneqarneranni tunuliaqutigineqanngitsoortarlutik.

Paasissutissat qarasaasiatigut katersat siunissami nunatsinni piffinni assigiinngitsuni uummassusillit pillugit ilisimasanut taputartuutaasussaapput. Qarasaasiatigut paasissutissaatigineqartut toqqorsivittut aammalu pisariaqartitsineq toqqammavigalugu piniartunit, aalisartunit piffinnilu innuttaasunit allanit paasissutissanik aallerfigineqarsinnaapput. Qarasaasiatigut paasissutissat imak ilusilersorneqarsimapput, sumut atorneqarnissaat toqqammavigalugu avatangiisini pissusiviusut allanngoriartornerat toqqammavigalugu imarisamigut nutarsarneqartarsinnaasassallutik. Taamaasillunilu paasissutissat aqqutigalugit piniartut, aalisartut ilisimatuullu piffissami sivikinnerusumi sivisunerusumilu ineriartorneq pillugu malinnaasinnaallutillu avatangiisit allanngoriartornerat toqqammavigalugit pissusiviusut pillugit assersuusiorsinnaasassallutik.

Qaammatit pingasukkaarlugit nalunaarsuisarnerit piffinni pisuussutit pillugit nikeriaallannerit maluginiarneqarsimasut toqqammavigalugit pisassiissutit pillugit kommunini Namminersornerusunilu ingerlatsisut pissusiusunik paasinnerunissaat aqqutissiuunneqarsinnaasassaaq, taamaasiornikkullu ingerlatsinermi iliuuseqaatissat pissusiviusut toqqammavigalugit aalajangiiffigineqarsinnaasassallutik. Paasissutissat pigineqartut atorlugit pisuussutit uummassusillit pillugit aalajangiinerit tutsuiginarnerusut toqqammavigalugit ingerlatsisoqartalersinnaassaaq, tamatumanilu ingerlatsinermi periusissat arlalippassuit saqqummiunneqareersimallutik. Ilai piviusunngortinneqareersimalerput, allat itigartitsissutigineqarsimanngikkunik akuerineqarnissamut utaqqisinneqarlutik. Aqutsinermi allannguutaasinnaasutut siunnersuutigineqarsimasut assigiinngitsorpassuulereerput, taamaattorli piffinni pisuussutinut assigiinngitsunut tamarmik attuumassuteqartarlutik. Pisuussutit uummassusillit pillugit aqutsinissaq imatut siunnersuuteqarfigineqarpoq: piffinni assigiinngitsuni aalisarnerup aqunneqarnerani, aalisarnermi periuserineqartut piujuaannartitsineq siunertaralugu atortut pisassiissutillu allanngortinneqartarnissaat, piffissap piniarfigalugulu aalisarfigineqarsinnaasup nikisiallanneqartarsinnaasarnissaa, taamatullu piffinni aalajangersimasuni angallatigineqarsinnaasut pillugit aalajangersaasinnaanerit aammalu piffinni siornatigut atuiffiusimanngitsuni pisuussutit uummassusillit iluaqutigineqarsinnaanerinut toqqammaviusinnaasut pillugit ineriartortitsisarnissaq.

Qarasaasiatigut paasissutissat aammalu quppersagaq allanngortinneqallattaajuartoq sakkugineqassapput. Atortussiat pineqartut piffinni soqutigisaqartunit atugassiissutigineqartassapput, soorlu ilinniartitsisuusartunit, ilisimatuunit aammalu politikkikkut aalajangiisartunit.

Piffinni pisuussutit uummassusillit pillugit nalunaarsuisarnerit ukiorpassuarni ingerlatsinermik soqutigisaqartut, ilisimatuut aammalu kommunini Namminersornerusunilu suliffeqartut akornanni suleqatigiittoqartarsimanera toqqammavigalugu ineriartortinneqarsimapput. Suleqatigiinnerlu imatut taaguuserneqarsimalluni: Piniakkanik Sumiiffinni Nalunaarsuineq (PISUNA).